भारतीय चर्चित अभिनेता मनोज कुमारको निधन

शुक्रबार, चैत २२, २०८१

काठमाडौँ  भारतीय चर्चित अभिनेता मनोज कुमारको निधन भएको छ । उनको शुक्रबार बिहान मुम्बईको कोकिलाबेन अस्पतालमा निधन भएको हो । ८७ वर्षीय मनोज कुमार आफ्नो देशभक्ति फिल्मका लागि चर्चित थिए । 

उनका उपकार, पूरव–पश्चिम, क्रान्ति, रोटी–कपडा और मकान चलचित्रले निकै नै प्रसिद्धी कमाएका थिए । 

उनका छोरा कुणाल गोस्वामीले समाचार एजेन्सी एएनआईलाई बताएअनुसार लामो समयदेखि स्वास्थ्य समस्या झेलिरहेका मनोज कुमारले अन्तिम समयमा भने धेरै दुःख बेहोर्नु परेन । 

उनको अन्तिम संस्कार शनिबार बिहान ११ बजे मुम्बईको पवनहंस स्मशान घाटमा हुनेछ । 

उनी लामो समयदेखि लिभर सिरोसिसको समस्याबाट पीडित थिए । उनको स्वास्थ्य बिग्रिएपछि गत २१ फेब्रुअरीमा अस्पताल भर्ना गरिएको थियो । 

उनले सात फिल्म फेयर अवार्ड पाएका थिए । त्यस्तै सन् १९९२ मा पद्मश्रीबाट सम्मान गरिएको थियो । त्यस्तै सन् २०१६ मा उनलाई दादा साहेब फाल्के अवार्ड दिइएको थियो । 

प्रकाशित मिति: शुक्रबार, चैत २२, २०८१  १३:२६
प्रतिक्रिया दिनुहोस्