नेपालगञ्ज । नेपाली कांग्रेसका केन्द्रीय सदस्य तथा पूर्व मन्त्री दिपक गिरीले संविधान संशोधनमा बिलम्ब गर्न नहुने बताएका छन् ।

काठमाडौंबाट दाङ जाने क्रममा नेपालगञ्ज विमानस्थलमा आज पत्रकाहरुसंग कुराकानी गर्दै गिरीले संविधान संशोधन अपरिहार्य रहेको बताए। उनले संघीय संरचनामा समेत हेरफेर गर्नुपर्ने धारणा राखे । 

संविधान संशोधनको एजेण्डासहित सात बुँदे सहमति गरेर नेपाली कांग्रेस र नेकपा एमालेको सरकार बनेको भन्दै उनले उक्त बुँदाहरु कार्यान्वयन गर्नुपर्नेमा जोड दिुए । दुबै दलले संविधान संशोधनमा चासो दिनुपर्ने गिरीको भनाई छ । यसमा प्रतिपक्ष दल नेकपा माओवादी पनि गम्भीर हुनुपर्ने उनको धारणा छ । 

गिरीले जनमत हिन्दु राज्यको पक्षमा रहेको भन्दै त्यसलाई नकार्न नसकिने बताए । लोकतन्त्रको विकल्पमा जनता सडकमा नआएको बताउँदै उनले हिन्दु राज्यका लागि भने जनता अग्रसर रहेको दाबी गरे ।

८० प्रतिशत बढी हिन्दु भएको देशलाई विश्वको एक मात्र हिन्दु राज्य घोषणा गर्नुपर्ने जनमत रहेको उनको जिकिर छ ।