बाँके । आफूलाई भारतीय गुण्डा नाइके लोरेन्स बिस्नोई र अनमोल बिस्नोई भएको भन्दै विभिन्न सामाजिक सञ्जालबाट धम्की दिँदै ५ करोड भारती रुपैयाँ  माग्ने व्यक्तिलाई इलाका प्रहरी कार्यालय कोहलपुरले पक्राउ गरेको छ।

सुर्खेतको भेरीगंगा नगरपालिका-७ काठेघारी घर भएर हाल बाँकेको कोहलपुर नगरपालिका-५ मा भाडामा बस्दै आएका ४१ वर्षीय रामबहादुर बुढा क्षेत्रीलाई भारतीय गुण्डा नाइकेको नाम लिएर धम्क्याउँदै करोडौं रुपैयाँ  माग गरेको आरोपमा कोहलपुरबाट पक्राउ गरिएको जिल्ला प्रहरी कार्यालय बाँकेले जानकारी दिएको छ।

जिल्ला प्रहरी कार्यालय बाँकेका अनुसार पक्राउ परेका रामबहादुरले विभिन्न विदेशी नम्बरका व्हाटएप्सबाट ध्म्क्याउँदै ५ करोड भारु माग गरेको र नदिएको खण्डमा जे पनि गर्न सक्ने भन्दै धम्की दिएको पाइएको हो।

पक्राउ परेका रामबहादुरको अपराधिक पृष्ठभूमी भएका व्यक्ति हुन् । वि.सं. २०५९ सालमा नेपाली सेनामा भर्ना बहेर छोटो समयसम्म मात्र सेवा गरी त्यहाँबाट भागेका थिए। सेनाबाट भागेका रामबहादुर कहिले कुन समुह त कहिले कुन समुहसँग मिलेर देशको विभिन्न स्थानमा अपराधिक क्रियाकलाप गर्ने गरेको प्रहरीले जानकारी दिएको छ।

प्रहरीका अनुसार रामबहादुरले अपराधिक क्रियाकलाप गर्नकै लागि भारतीय आधारकार्ड बनाएको खुल्न आएको छ। 

यस्तो छ रामबहादुरको अपराधिक पृष्ठभूमि-

१. इलाका प्रहरी कार्यालय काँकरभिट्टा झापाबाट मिति २०६१-०४-२७ मा ललाईफकाई बिबाह गर्छु भनि नेपाली युवतीलाई काँकरभिट्टा हुँदै भारत तर्फ लगि गएकोमा जिउ मास्ने बेच्ने उद्योग मुद्धा लागेको ।

२.जिल्ला प्रहरी कार्यालय झापाबाट २०६२-१२-०८ मा धाक धम्की दिदै सर्वसाधारणबाट चन्दा अशुली गर्ने गरेकोले मुद्धा लागेको।

३. महानगरिय परिसर काठमाण्डौबाट २०६४-०५-०९ मा धाक धम्की दिई मानिसलाई नियन्त्रणमा लिई ट्याक्सीमा राखि फिरौती रकम असुल गरेकोले मुद्धा चलेको ।

४. इलाका प्रहरी कार्यालय छिन्चु सुर्खेतबाट २०६४-१२-२७ गते संविधान सभा निर्वाचन २०६४ का उम्मेदवार ऋषि शर्मा प्रचार प्रसार सकेर आउँदै गर्दा सुर्खेत मेहलकुना जहरेबजार नजिक लोधे भन्ने स्थानमा निज समेतले गोली हानी मारेको कर्तव्य ज्यान मुद्धा चलेको।

५.२०६५ साल चैत्रमा द्वन्द पिडित सेना प्रहरीको आन्दोलनमा हतियार खोसेको विषयमा काठमाण्डौमा मुद्दा चलेको।

६.कोटेश्वरको निखिलेश्वर मन्दिरमा शक्ती बहादुर बस्नेतलाई गोली हानेको केशमा ५ वर्ष कैद र रु.६० हजार जरीवाना फैसला भएकोमा उक्त कैद भुक्तान गरी २०७०-११-२८ गते कारागारबाट छुटेको ।