नेपालगञ्ज । नेपालगञ्जमा ५० दिने कार्यस्थलमा आधारित सीप-क्षमता विकास तालिम सुरु भएको छ । युवा रोजगारी प्रवर्द्धन गर्ने उद्देश्यका साथ नेपालगञ्ज उपमहानगरपालिका रोजगार सेवा केन्द्रको आर्थिक सहयोग तथा नेशनल मानस ट्रेनिङ इन्स्टिच्युट प्रालि नेपालगञ्जको संयोजनमा ५० दिने कार्यस्थलमा आधारित सीप क्षमता विकास तालिमको शुभारम्भ गरिएको छ ।

नेपालगञ्ज उपमहानगरपालिका वडा नम्बर २० का वडा अध्यक्ष तथा निर्देशक समिति सदस्य कौशल कुमार धोबीको अध्यक्षता एवम् लुम्बिनी प्रदेश सभा सदस्य अम्बिका काफ्लेको प्रमुख अतिथ्यतामा उद्घाटन कार्यक्रम सम्पन्न भएको थियो । कार्यक्रममा वडा नम्बर १९ र २० का गरी कुल ४० जना प्रशिक्षार्थी सहभागी रहेका छन् । उनीहरूलाई मेसन (गृह निर्माण सम्बन्धि) तथा पलम्बर ९प्लम्बिङ० तालिम प्रदान गरिनेछ ।

रोजगार संयोजक मञ्जु ज्ञवालीले तालिमका उद्देश्यबारे प्रकाश पार्दै यस्ता सीपमूलक कार्यक्रमहरूले युवाहरूलाई आत्मनिर्भर बनाउन तथा रोजगारका अवसर सिर्जना गर्न ठोस योगदान पुर्‍याउने बताइन् । उनका अनुसार तालिमले सीप विकास मात्र नभई व्यावहारिक कार्य अनुभव पनि प्रदान गर्नेछ । उद्घाटन समारोहमा प्रदेश सांसद अम्बिका काफ्लेले युवाहरूको आर्थिक सशक्तिकरणका लागि यस्ता सीप विकास तालिमहरूको महत्त्व दर्शाउँदै आगामी दिनमा थप बजेट बिनियोजन गर्ने प्रतिबद्धता व्यक्त गरिन् ।

रोजगार सहायक अनुप बर्माले यस योजनाले स्थानीय युवाहरूलाई रोजगारीमा जोड्न महत्वपूर्ण भूमिका निर्वाह गर्ने विश्वास व्यक्त गरे । कार्यक्रममा प्राविधिक सहायक कमला ओलीको पनि उपस्थिति रहेको थियो । प्रशिक्षार्थीहरूले तालिमलाई आफ्नो भविष्य निर्माणका लागि महत्त्वपूर्ण अवसरको रूपमा लिएको बताएका छन् ।

तालिमको सफलताबाट दक्ष जनशक्ति उत्पादन हुने र स्वरोजगार तथा अन्य रोजगारीका अवसरहरू सिर्जना हुने अपेक्षा गरिएको छ ।