काठमाडौँ । निर्मल निवासबाट लफङ्गाहरूलाई माला लगाएर जनताको घर जलाउन पठाएको नेकपा एमालेका सांसद योगेशकुमार भट्टराईले आरोप लगाएका छन् ।

आजको प्रतिनिधि सभाको बैठकमा बोल्दै सांसद भट्टराईले पुर्वराजा ज्ञानेन्द्र शाहले राज्यसँग गरेको सम्झौता भङ्ग गरेको भन्दै उनलाई दिएको सेवा सुविधा कटौती गर्नेबारे सोच्नुपर्ने बताए । उनले पूर्वराजाले शाहले राज्यसँग गरेको सम्झौता भङ्ग गरेकोले उनलाई दिइएको सेवा सुविधा कायम रहन्छ कि रहँदैन ? भन्दै प्रश्न गर्दै सरकारसँग जवाफ माग गरे । 

उनले भने, ‘पूर्वराजा शाहलाई सरकार पूर्व राष्ट्राध्यक्षको हिसाबले यो राज्यले सेवा सम्मान दिन्छ भनेर दिएको हो । आज त्यो सम्झौता पनि ज्ञानेन्द्र शाहले भङ्ग गरे । त्यसैले आज म यो संसद्मार्फत प्रश्न गर्न चाहन्छु । सम्झौता भङ्ग भएपछि उनलाई दिएको सेवा सुविधा कायम हुन्छ कि हुँदैन ? म सरकारलाई सोध्न चाहन्छु । उनले सम्झौता भङ्ग गरे । उनले लफङ्गाहरूलाई जनकमान्डर बनायो । तीनकुनेमा ताण्डव नृत्य नचाउन पठाउनु भयो । म फेरि भन्छु । निर्मल निवासबाट लफङ्गाहरूलाई माला लगाएर जनताको घर जलाउन पठाउनु भयो । तपाईँको सम्झौता भङ्ग भयो । त्यसैले तपाईँलाई दिइएको सेवा सुविधा के हुन्छ ? सरकारले जवाफ दिनुपर्‍यो ।’

उनले पृथ्वीनारायण शाह र बहादुर शाह बाहेकका राजाले राष्ट्र जोगाउने काम गर्न नसकेको बताए । उनले नेपालको सिमाना कहाँ थियो आज कहाँ छ ? भन्दै प्रश्न गरे ।