नेपालगञ्ज । बाँकेमा पनि इस्लाम धर्माबलम्बीहरुले धुमधामका साथ इद उल फित्र पर्व मनाइरहेका छन् । नेपालगञ्जमा विहान सामूहिक नमाज पढिएको छ । वीपी चोकस्थित इदगाहमा सामूहिक नमाज पढिएको हो ।

इदगाहभित्र ठाउँ नपुगेर बाहिर सडकमै बसेर पनि नमाज पढेका थिए । यस्तै जिल्लाका अन्य मस्जिदहरुमा पनि नमाज पढिएको छ । एक आपसमा अंकमाल गर्दै शुभकामना साटासाट गरिएको छ । 

इद उल फित्र मुस्लिम समुदायको महत्वपूर्ण चाड मध्ये एक हो । यो चाड इस्लामिक पात्रो अनुसार नवौँ महिना रमजानभर गरिएको उपवास (रोजा) को समापनमा मनाइन्छ । रोजाको दौरान मुस्लिम धर्मावलम्बीहरूले सूर्योदयदेखि सूर्यास्तसम्म भोजन, पानी तथा अन्य भौतिक सुख–सुविधाबाट टाढा रहन्छन् । जानकारहरुका अनुसार, यो अवधिमा आध्यात्मिक शुद्धता, दानशीलता, सहानुभूति, तथा आत्मसंयमको अभ्यास गरिन्छ ।

नेपालमा मुस्लिम समुदायले इद विशेष हर्षोल्लासका साथ मनाउँछन् । यो अवसरमा दान (जकातुल फितर) दिनु अनिवार्य मानिन्छ, जसले गरीब तथा आवश्यक सहयोग चाहिने व्यक्तिहरूलाई मद्दत गर्न सकिन्छ । इदमा विशेष परिकारहरू तयार गरिन्छन्, जसमा मिठाई, खजुर, सेवाईं तथा विभिन्न परिकारहरू समावेश गरिन्छन् ।

परिवारजन, आफन्त तथा छिमेकीहरूबीच भोज तथा भेटघाटको विशेष महत्व रहन्छ ।