काठमाडौँ । काठमाडौँ महानगरपालिकाले तीनकुनेमा भएको हिंसात्मक प्रदर्शनका क्रममा तोडफोड र फोहर गरेको आरोपमा पूर्वराजा ज्ञानेन्द्र शाहलाई ७ लाख ९३ हजार रुपैयाँ जरिबाना तोकेको छ। महानगरले ज्ञानेन्द्र शाहलाई तोकेर विभिन्न पत्र काटेर जरिबाना तोकेको हो । 

विवादित मेडिकल व्यवसायी एवं फौजदारी मुद्दाका आरोपी दुर्गा प्रसाईंको आह्वानमा राजसंस्था पुनर्स्थापनाको मागसहित भएको प्रदर्शनमा राजावादीहरुले महानगरपालिकाका विभिन्न संरचना, दमकल तथा अग्नि नियन्त्रकहरूमा आक्रमण गरेका थिए ।

यस घटनापछि महानगरले सार्वजनिक सम्पत्तिमा भएको क्षतिको जिम्मेवारी पूर्वराजा शाहलाई तोक्दै दुई दिन लगाएर क्षतिको विवरण संकलन गर्दै शनिबार अपरान्ह जरिबाना लगाउने निर्णय गरेको हो।

 यसअघि जुनसुकै दलले आफ्नो कार्यक्रमका क्रममा क्षति पुर्याउनेमाथि जरिबाना तिराउँदै आएकामा यसपालि घटनाको २४ घण्टा बितिसक्दासमेत कुनै प्रतिक्रिया नआएपछि उनीमाथि शंका गरिएको थियो । 

दुर्गा प्रसाईंको नेतृत्व र राप्रपाका नेताहरूको सहयोगमा प्रदर्शन भए पनि यसको मुख्य जिम्मेवार निर्मल निवास भएको निष्कर्षमा बालेनको टोली पुगेको हो । 

पूर्वराजा ज्ञानेन्द्र शाहसँग छलफल गरेर नै हिंसात्मक आन्दोलनको नेतृत्व दुर्गा प्रसाईंलाई दिइएको ठहरसहित मेयर वालेन्द्र साह बालेनको टोली पूर्वराजालाई दोषी देखाउन कुनै प्रमाण नचाहिने निचोडमा पुगेको हो । 

तीनकुने क्षेत्रमा महानगरपालिकाको अधिकार क्षेत्रमा पर्ने सम्पत्ति क्षतिको मूल्यांकन गरी पत्र पठाइएको हो । महानगरको टोलीले शुक्रबार र शनिबार गरी क्षतिको विवरण संकलन गरेको थियो । 

यसपालि नागरिकको घर, संचारमाध्यम, जडिबुटी उत्पादन तथा प्रशाधन केन्द्र, सवारी साधनहरुमाथि आगलागी लगायतका घटना गराइएको थियो भने दुई जनाको ज्यान गएको थियो ।