नेपालगन्ज । भोलि शनिबार बिहान नेपालगन्जमा हुने प्रातःकालीन हिँडाई अर्थात वाकाथनमा सबैलाई सहभागी हुन डा. किशोर खत्रीले आह्वान गरेका छन् ।

नेपाल चिकित्सक संघ बाँकेले आयोजना गरेको वाकाथनका संयोजक डा. खत्रीले स्वास्थ्यका लागि प्रातःकालीन हिँडाई भन्ने मूल नारासहित वाकाथन हुन लागेको आज नेपालगन्जमा आयोजित पत्रकार सम्मेलनमार्फत जानकारी दिए । 

आज नेपालगन्जमा पत्रकारहरुसँगको भेटघाटमा वाकाथनको टिसर्ट सार्वजनिक गर्दै उनले स्वास्थ्य सचेतना विस्तार गर्ने उद्देश्यसहित वाकाथन आयोजना गरिएको बताए । बालरोग विशेषज्ञ डा. खत्री वाकाथानलाई अभियानकै रुपमा लिएर हिँडेका छन् । हिँड्नु स्वास्थ्यका लागि स्वस्थ हुने पहिलो आधार हो भन्ने गरेका उनले आफूले यसलाई अभियानको रुपमा अगाडि बढाएको बताए । ‘पूर्व राजा ज्ञानेन्द्र शाहदेखि पार्टीका उच्च पदाधिकारीहरुसँग विहानी प्रहरको हिँडाईमा सहभागी भइसकेको जानकारी दिँदै उनले भने–‘अब नेपालगन्जबासीसँग सँगै हिँडेर यसको महत्व बुझाउनु छ ।’ 

शनिवार नेपालगन्जको गणेशमान चोक नजिकै रहेको नेपाल चिकित्सक संघ, भेरी शाखाबाट बिहान साढे ६ बजेदेखि सुरु हुने वाकाथन विरेन्द्र चोक पुगेर पुनः गणेशमान चोकमा आएर समापन हुने उनले बताए । ‘स्वास्थ्य सचेतना विस्तार गर्ने तथा नेपालगन्जको पर्यटकीय स्थलहरुको प्रवर्द्धन गर्ने र आम नेपाली दाजुभाई, दिदिवहिनीहरुलाई एकताको मालामा गाँस्ने उद्देश्य पनि यो वाकाथनको हो’–उनले भने । 

उक्त वाकाथनमा स्वास्थ्य तथा जनसंख्या मन्त्री प्रदीप पौडेल, स्वास्थ्य सचिव डा.विकास देवकोटा समेत सहभागी हुने कार्यक्रम संयोजक डा.खत्रीले जानकारी दिए । कार्यक्रममा सहभागी बन्न दाङबाट ठुलो संख्या सहभागी आइसकेको हुँदा बाँकेवासीहरु पनि वाकाथनमा सहभागी बन्न डा .खत्रीले आह्वान गरेका हुन् ।