नेपालगञ्ज । नेपालगञ्जस्थित महेन्द्र बहुमुखी क्याम्पसको स्ववियुमा अनेरास्ववियुको प्यानल नै विजयी भएको छ ।

आज दिउँसो सम्पन्न मतगणना अनुसार सभापतिमा केशर जंग शाह ७२ मत अन्तरका साथ निर्वाचित भएका छन् । शाहले ५९९ मत प्राप्त गरेका छन् । अखिल क्रान्तिकारीका हरेन्द्र बहादुर विक, नेविसंघका सन्तोष रावल र समावेशी विद्यार्थी समूहका निशान थारु सभापति पदको प्रतिष्पर्धामा थिए । विकले ५२७, रावलले ३६४ र थारुले १६० मत प्राप्त गरेका छन् । 

सचिवमा चिरञ्जीवी बुढा र कोषाध्यक्षमा सुरेन्द्र रावल विजयी भएको निर्वाचन समितिले जनाएको छ । यसैगरी सदस्यहरुमा अमिश विक, बन्दना थारु, अंकित कुमार यादव, टक्क रोकाया, निरज यादव, राजीव शाह, शिशिर सुवेदी र गोपाल आउजी निर्वाचित भएका छन् । ४ हजार ६ सय ६० मतदाता रहेको महेन्द्र बहुमुखी क्याम्पसमा १ हजार ६ सय ९८ मत खसेको थियो । मंगलबार मतदान भएको थियो । 

यो संगै  बाँकेका तीन वटै क्याम्पसमा अनेरास्ववियुले जित हासिल गरेको छ । खजुरास्थित ज्ञानोदय पब्लिक बहुमुखी क्याम्पसमा अनेरास्ववियुका सर्विन महतो र नेपालगञ्ज नर्सिंग क्याम्पसमा अनेरास्ववियुकै देवर्चना अधिकारी निर्वाचित भएका छन् । खजुरामा अनेरास्ववियु र नेविसंघको गठबन्धन थियो ।