काठमाडौं । प्रतिनिधि सभा बैठकमै स्वास्थ्यमन्त्री प्रदिप पौडेललाई बर्खास्त गर्न माग गरिएको छ। सांसद अमरेश कुमार सिंहले स्वास्थ्यमन्त्री  पौडेललाई बर्खास्त गर्न माग गरेका छन् । 

डा.संगिता मिश्रको प्रशंगलाई लिएर स्वतन्त्र सांसद सिंहले आज स्वास्थ्यमन्त्री पौडेललाई बर्खास्त गर्न माग गरेका हुन् । आजको प्रतिनिधि सभा बैठकमा सांसद सिंहले  प्रधानमन्त्री केपी शर्मा ओलीलाई स्वास्थ्यमन्त्री पौडेललाई तुरुन्त बर्खास्त गर्न माग गरेका थिए ।

मन्त्री पौडेललाई बर्खास्त गर्न माग गर्दै सांसद सिंहले भनेका थिए- ‘किनकी, उहाँले भन्नुभएको छ कि स्वास्थ्य मन्त्रालयमा कुनै मधेसी रहँदैन।'

स्वास्थ्य मन्त्रालयको सचिवमा हिजो भएको निर्णयप्रति विरोध जनाए । मन्त्रिपरिषद्को बुधबारको बैठकले स्वास्थ्य सचिवमा विकास देवकोटालाई बढुवा गर्ने निर्णय गरेको थियो ।

सिनियरका आधारमा डा. संगिता मिश्र हुनुपर्नेमा देवकोटालाई गरिएको भन्दै सांसद सिंहले आपत्ति जनाएका हुन्। ‘संगिता मिश्र व्यक्तिसँग मेरो केही चिनजान छैन । संगिता मिश्र मधेसीको आस्थाको एउटा प्रतिक थियो,’ सिंहले प्रतिनिधि सभा बैठकमा भने ।