रुपन्देही  । नेपाली कांग्रेसका सभापति शेरबहादुर देउवाले पार्टीभित्रको मतभेदहरु हटाउनुपर्ने बताएका छन् । देउवाले मतभेद हटाएर कांग्रेसलाई जीवन्त भाइब्रेन्ट डेमोक्रेटिक पार्टीको रुपमा अगाडि बढाउनुपर्नेमा जोड दिए ।

भैरहवामा आज कांग्रेस प्रतिनिधि सभा क्षेत्रीय सभापति तथा क्षेत्रीय प्रशिक्षण शाखा प्रमुखको प्रशिक्षण तथा अभिमुखीकरण कार्यक्रमको उद्घाटन सत्रलाई सम्बोधन गर्दै सभापति देउवाले यस्तो बताएका हुन् ।

उनले कांग्रेसलाई जीवन्त भाइब्रेण्ट डेमोक्रेटिक पार्टी बनाउन सके पार्टीप्रति नागरिकको आकर्षण बढ्दै जाने विश्वास व्यक्त गरे । पूर्वप्रधानमन्त्री समेत रहेका देउवाले भने, हाम्राबीचमा धेरै किसिमका मतभेदहरु हुन सक्छन्, कतिपय कुराहरु नमिलेका पनि हुन सक्छन् । ती सबैकुरालाई आपसमा छलफल, मेलमिलाप र कुराकानी गरेर मतभेद हटाएर हिजो भन्दा आज ठूलो पार्टी बनाउनुपर्छ ।

उनले लोकतन्त्ररप्रजातन्त्रमा प्रतिपक्ष पार्टीको धैरै भूमिका हुने बताउँदै  देशमा रहेको लोकतन्त्र र प्रजातन्त्र समावेशी, समानुपातिक र विपक्षी दलसहितको व्यवस्थाले बनेको तर्क गरे ।

कांग्रेसको केन्द्रीय नीति, अनुसन्धान तथा प्रशिक्षण कार्यक्रमको आयोजना तथा कांग्रेस क्षेत्र नम्बर-३ रुपन्देहीको आतिथ्यतामा शुरु भएको कार्यक्रम मंगलबार  सम्म सञ्चालन हुने क्षेत्रीय सभापति सुशील गुरुङले बताए ।

नीति अनुसन्धान प्रतिष्ठानका प्रमुख तथा कांग्रेस उपसभापति पूर्णबहादुर खड्काका अनुसार प्रशिक्षणमा देशका क्षेत्रीय सभापति, क्षेत्रीय प्रशिक्षण प्रतिष्ठान प्रमुख र एउटै निर्वाचन क्षेत्र भएका जिल्लाका सभापति र उपसभापति समेत गरेर ३ सय ३० जनाभन्दा बढी नेता कार्यकर्ताहरु भैरहवा बताइएको छ । 

प्रशिक्षणमा पार्टीलाई कसरी संस्थागत र बलियो बनाउन सकिन्छ भन्ने विषयमा विशेष छलफल हुने जनाइएको छ ।