नेपालगन्ज । नेपाल कुशवाहा कल्याण  समाज बाँकेले डुडुवामा श्रद्धाञ्जली सभा, होली मिलन तथा सम्मान कार्यक्रम सम्पन्न गरेको छ ।

नेपाल कुशवाहा कल्याण समाज बाँकेका अध्यक्ष राज कुमार मौर्यको अध्यक्षता एवम् नेपाल कुशवाहा कल्याण  समाजका केन्द्रीय सचिव भरत महतोको प्रमुख आतिथ्यतामा कार्यक्रम सम्पन्न भएको हो । 

कार्यक्रममा जिल्ला कार्यसमितिका पदाधिकारी, बर्गीय समाजका पदाधिकारी, समाजका अगुवा, युवा, विद्यार्थी, कर्मचारी लगायतको उपस्थिति थियो । त्यस अवसरमा कर्मचारी, समाजसेवी र उत्कृष्ट विद्यार्थीलाई सम्मान गर्नुको साथै एक आपसमा होलीको शुभकामना आदानप्रदान समेत गरिएको थियो । 

सहसचिव कमलेश मौर्यले स्वागत  मन्तब्य ब्यक्त गरेको कार्यक्रममाथि कुशवाहा कल्याण समाज डुडुवा गाउँपालिकाका अध्यक्ष अशोक मौर्यले प्रकाश पारेका थिए ।कार्यक्रम संचालन अजय मौर्यले गरेका थिए ।

यस्तै कार्यक्रममा नेपाल कुशवाहा कल्याण  समाजका संस्थापक सिताराम महतोप्रति श्रद्धाञ्जली पनि अर्पण गरिएको छ । महतोको यही फागुन ८ गते निधन भएको थियो । बाँकेमा करीब सात हजार मौर्यहरुको जनसंख्या रहेको छ ।