नेपालगन्ज । उपप्रधान एवम् सहरी विकास मन्त्री प्रकाशमान सिंहले नेपालगन्जमा नवनिर्मित सिटी हलको उद्घाटन गरेका छन् ।

उपप्रधानमन्त्री सिंहले नेपालगन्ज उपमहानगरपालिका वडा नम्बर १४ भवानियापुरस्थित नगरकै अहिलेसम्मकै ठूलो क्षमताको सुविधा सम्पन्न सिटी हलको आज एक समारोहका बीच उद्घाटन गरेका हुन् । 

सहरी विकास मन्त्रालय, सहरी विकास तथा भवन निर्माण विभाग, सघन सहरी तथा भवन निर्माण आयोजनाले सिटी हल निर्माण गरेको हो। ठेकेदार कम्पनी लामा कन्स्ट्रक्सनले २८ करोड बढी लागतमा निर्माण सम्पन्न गरेको सिटी हलमा ७९५ सिट क्षमताको सुविधा सम्पन्न हल छ । त्यस बाहेक अन्य साना तीन वटा बहुउद्देश्यीय हल पनि छन् । २०७५ देखि निर्माण सुरु भएको सिटी हल २०८१ साउन २० गते सम्पन्न भएको सघन सहरी तथा भवन निर्माण आयोजना नेपालगन्जका कार्यालय प्रमुख रामकृष्ण आचार्यले बताए । सिटी हल उद्घाटन पश्चात् उपप्रधानमन्त्री सिंहले नेपालगन्ज उपमहानगरपालिकाका प्रमुख प्रशान्त विष्टलाई हस्तान्तरण गरेका थिए । 

सिटी हल उद्घाटन गर्दै उपप्रधानमन्त्री सिंहले सिटी हलको सही सदुपयोग गर्नुपर्ने बताए । उनले सिटी हलले नेपालगन्ज क्षेत्रको आर्थिक क्रियाकलाप प्रवर्द्धनमा टेवा पुग्ने विश्वास व्यक्त गरे । नेपालगन्ज उपमहानगरपालिकाका नगर प्रमुख विष्टले सिटी हल छिट्टै संचालनमा ल्याइने बताए । विष्टले सिटी हलको संरक्षण र सम्बर्द्धनमा लागिपर्ने बताए । 

कार्यक्रममा संघीय सांसदहरु किशोर सिंह राठौर, दीपा शर्मा, लुम्बिनी प्रदेशका आन्तरिक मामिला तथा कानुन मन्त्री आदेश कुमार अग्रवाल, नेपालगन्ज उपमहानगरपालिकाका प्रमुख विष्ट लगायतले बोलेका थिए । सहरी विकास मन्त्रालयका सचिव गोपाल प्रसाद सिग्देलको अध्यक्षतामा उद्घाटन कार्यक्रम सम्पन्न भएको थियो ।