नेपालगञ्ज । बाँकेस्थित नेपालगञ्जको राँझा विमानस्थलमा बृहत् आपतकालीन पूर्व अभ्यास गरिएको छ ।

विमानस्थलभित्र जहाज दुर्घटना भएको अवस्थामा विमानस्थल संचालन र आपतकालीन उद्धारमा सरोकारवालाहरुको सक्रियतालाई व्यवहारिकरुपमै आज बिहान अभ्यास गर्न बृहत् आपतकालीन पूर्व अभ्यास गरिएको हो।

 फायर फाइटर, सेना, सशस्त्र प्रहरी र जनपथ प्रहरी, रेडक्रसका उद्धार टोली विमानस्थलमा आएका थिए । एम्बुलेन्स तथा दमकल समेत तयारी अवस्थामा राखी फुल स्केलको आपतकालीन अभ्यास गरिएको राँझा विमानस्थल कार्यालयले जानकारी दिएको छ। 

पूर्व अभ्यासमा एकाएक विमान दुर्घटना भएको दृश्य देखिन्छ । तत्काल दमकल पुगेर आगो निभाउँछ । सुरक्षाकर्मीले घाइतेहरुको उद्दार गर्छन् र अस्पताल पठाउँछन् । पूर्व अभ्यासको समयमा विमानस्थल बन्द गरिएको थियो ।