काठमाडौं  । नेपाली कांग्रेसबाट निर्वाचित लुम्बिनी प्रदेश सांसद निमा गिरी सम्मानित भएकी छिन् ।

नेपाल निजामती कर्मचारी युनियन प्युठानको ९औं जिल्ला अधिबेशनको अवसरमा लुम्बिनी प्रदेश सांसद गिरीलाई युनियनले प्रदेशमा रहेर प्रदेश निजामती ऐन र स्थानीय तह निजामती ऐन लगायत निर्माणमा महत्वपूर्ण भूमिका खेलेको तथा नीति सुधारमा आवाज उठाई कार्यान्वयन गरेको भन्दै उत्कृष्ट सांसदको रुपमा आज सम्मान गरेको हो ।

उक्त कार्यक्रमको अध्यक्षता कर्मचारी युनियन प्युठानका अध्यक्ष खिम बहादुर अधिकारीले गरेका थिए भने सञ्चालन बिष्णु थापाले गरेका थिए । यो सम्मानले आफूलाई अझ सशक्त र उर्जाशील बनाउन हौसला प्रदान गरेको बताइन् । सम्मानका लागि गिरीले कर्मचारी युनियनलाई धन्यबाद समेत ब्यक्त गरिन् । 

गिरी मात्र एक त्यस्ती सांसद हुन् जसले आफ्नो बार्षिक प्रतिबेदन (रिपोर्ट कार्ड) हरेक बर्ष सार्वजनिक गर्दै आएकी छिन् । कांग्रेस लुम्बिनी प्रदेश सहमहामन्त्री समेत रहेकी गिरीले पारदर्शिता र जबाफदेहिताका लागि आफ्नो 'रिपोर्ट कार्ड' सार्वजनिक गर्दै आएकी छिन् ।