काठमाडौँ । प्रतिनिधि सभाको हिउँदे अधिवेशन आजेदेखि शुरु भएको छ । सांसदहरु चिटिक्क परेर साढे चार महिनापछि संसदमा पुगेका छन् । तर बैठकको शुरुमै विपक्षी दल राष्ट्रिय स्वतन्त्र पार्टी रास्वपाले विरोध गरेको छ । 

आफूले पहिले बोल्न नपाएपछि रास्वपाले संसद बैठक नै बहिस्कार गरेर बाहिरिएको छ । यसअघि रास्वपाका सांसदहरु उभिएर संसद बैठकमा अवरोध गरेका थिए् । सभामुख देवराज घिमिरेले दलीय आधारमा बोल्न दिने भनी पटक पटक अनुरोध गरे पनि रास्वपाले पहिले बोल्न पाउनु पर्ने भन्दै अवरोध गरेको थियो । 

आजको बैठकमा प्रधानमन्त्रीसँगै दलहरुका शीर्ष नेताले सम्बोधन गर्ने कार्यसूची छ । यो पाँचौँ अधिवेशन हो । 

सभामुखले आफ्नो पालोमा बोल्न आग्रह गरे पनि रास्वपा सांसदहरुले बैठक अगाडि बढाउन दिएननन् । उनले पटक पटक सभा सञ्चालन गर्न दिन आग्रह गरिरहे । 

पटक पटक अनुरोध गर्दा पनि नमानेपछि १ बजेदेखि शुरु भएको बैठकको १ः२३ बजे आदेश नै दिएका थिए् । उनले भने, ‘माननीयहरु विशेष अनुरोधले नपुगेर आदेश गर्दछु बस्नुस् ।’

केही मिनेटपछि उनले भने, ‘मैले आसन ग्रहणका लागि आदेश दिइसकेको छु । हाम्रो नियमावलीले त्यही कुरा भन्छ । त्यसैले माननीय सदस्यहरु प्रतिनिधि सभा नियमावली २०७९ अनुसार बसेर सभा सञ्चालन गर्नका लागि आदेश गर्दछु ।’

तर रास्वपा सांसदहरु नबसेपछि राष्ट्रपतिको कार्यालयबाट प्राप्त पढेर सुनाउने भन्दै अगाडि बढे । आजको कार्यव्यवस्था परामर्श समितिको बैठकमासमेत कुनै छलफल नभएको विषयमा आएर रास्वपाले विरोध गरेको भन्दै सभामुख देवराज घिमिरेले अगाडि बढेको बताएका हुन् । 

राष्ट्रपतिको पत्र पढ्न थालेसँगै आफूहरुले पहिले बोल्न नपाए बैठक बहिस्कार गर्ने भन्दै रास्वपा १ः४० पछि बाहिरियो । 

सभामुखले त्यसपछि प्रधानमन्त्री केपी शर्मा ओलीलाई समय दिए ।