बाँके। बाँकेको राप्तीसोनारी गाउँपालिका-८ स्थित शम्शेरगन्जको ओभरी जंगलमा बाघको आक्रमणमा एक महिलाको मृत्यु भएको छ।

बुधबार दिउँसो सवा ४ बजे ओभरीकै स्थानीय क ६७ वर्षीया महिला सेती बुढाको पाटेबाघको आक्रमणबाट मृत्यु भएको सशस्त्र प्रहरी बल नं.४२  रिजर्भ गण शम्शेरगन्जले जानकारी दिएको छ।

सशस्त्र प्रहरी रिजर्भ गणका अनुसार बुढालाई बाघले भगवती सामुदायिक बनमा सुक्खा दाउरा लिन गएका बेला आक्रमण गर्दा मृत्यु भएको थियो।

बुढा सामुदायिक बनमा साथीहरुसँग दाउरा लिन गएका बेला अलि टाढा दाउरा खोज्ने क्रममा बाघले आक्रमण गर्दा बुढाको घटनास्थलमै मृत्यु भएको थियो। बुढा घरमा अबेरसम्म नगएपछि स्थानीयहरुले खोजी गर्दा उनकै छोरीले आमालाई मृत अवस्थामा फेला पारेको सशस्त्र प्रहरीले जानकारी दिएको छ।

लगत्तै बुढाकी छोरीले प्रहरीलाई खबर गरेपछि सशस्त्र प्रहरीसहित गएको प्रहरीले उनको शव जंगलबाट ल्याएको हो। सशस्त्र प्रहरीका अनुसार बाघको बुढाको दाहिने खुट्टा खाएको अवस्थामा शव भेटिएको थियो।

यता सशस्त्र प्रहरीले राष्ट्रिय निकुञ्जभित्र र सामुदायिक बनमा एक्लै नहिडन सम्बन्धित सबै स्थानीयलाई आग्रह गरेको जनाएको छ।