सोसल मिडिया
हाम्रो बारेमा
सम्पर्क
काठमाडौँ । कुनै खेलको विश्वकपको फाइनलमा पुग्नु चानचुने कुरा होइन । नेपाल यसपटक एउटै खेलको विश्वकपमा महिला र पुरुष टोली एकैपटक फाइनलमा प्रवेश गरेका छन् ।
नेपाली खो खो खेलले विश्वकपको फाइनलमा पुगेर इतिहास रचिसकेको छ । नेपाली कुनै पनि खेलकुदको विश्वकपको फाइनलमा पुग्ने खो खो पहिलो खेल हो ।
भारतमा जारी विश्वकपको महिला र पुरुष दुवैतर्फ नेपाल फाइनलमा पुगेर रेकर्ड बनाइसकेको छ । फाइनलमा नेपालका दुवै टोलीले उपाधिका लागि भारतसँग खेल्नेछन् ।
सेमिफाइनलमा नेपालको महिला टिमले युगाण्डालाई ८९–१८ ले तथा पुरुष टिमले इरानलाई ७२–२० ले पराजित गर्दै फाइनल पुगेको हो ।
दुवै फाइनल खेल आज राति सम्पन्न हुनेछन् । नयाँदिल्लीस्थित ईन्दिरा गान्धी इन्डोर हलमा महिलातर्फको फाइनल बेलुका ७ बजे शुरु हुनेछ भने पुरुषतर्फको फाइनल खेल राति ८ः१५ देखि शुरु हुनेछ ।
अहिलेसम्म नेपालबाट कुनै पनि खेलले विश्वकपको फाइनलमा पुगेको यो पहिलो पटक हो । नेपाल महिलातर्फ अपराजित रहँदै र पुरुषतर्फ एक खेल हारेर फाइनलमा पुगेको हो । पुरुषतर्फ नेपाल पहिलो खेलमा भारतसँगै पराजित भएको थियो ।
महिलातर्फ नेपाले समूह चरणमा भुटानलाई ९३–२४ ले, दोस्रो खेलमा जर्मनीलाई ७३–३४ ले, तेस्रो खेलमा श्रीलंकालाई ११०–१० ले र चौथो खेलमा बंगलादेशलाई ८४–२४ ले पराजित गरेको थियो ।
त्यसैगरी क्वार्टरफाइनलमा इरानलाई १०३–८ ले तथा सेमिफाइनलमा युगाण्डालाई ८९–१८ ले पराजित गरेको हो ।
यसैगरी पुरुषतर्फ समूह चरणमा भारतसँग ४२–३७ ले पराजित हुँदा पेरूलाई ८०–३४ ले, तेस्रो खेलमा ब्रजिललाई १३४–८ ले तथा भुटानलाई ९८–८ ले हराएको थियो ।
क्वार्टरफाइनलमा बंगलादेशलाई ६७–१८ ले तथा सेमिफाइन्लमा इरानलाई ७२–२० ले पराजित गर्दै फाइनलमा पुगेको हो ।
