सोसल मिडिया
हाम्रो बारेमा
सम्पर्क
नेपालगञ्ज । नेपालगञ्ज उद्योग बाणिज्य संघले नेपाल पत्रकार महासंघमा नवनिर्वाचितहरुलाई बधाई ज्ञापन गर्दै सम्मान गरेको छ । संघको ५७औं स्थापना दिवसको अवसरमा आज संघको कार्यालय त्रिभुवनचोकमा आयोजित एक कार्यक्रमका बीच गत मंसिर २८ गते सम्पन्न निर्वाचनबाट निर्वाचितहरुलाई सम्मान गरिएको हो ।
संघका अध्यक्ष टंकबहादुर धामीको अध्यक्षतामा भएको कार्यक्रममा नेपाल पत्रकार महासंघ लुम्बिनी प्रदेशमा बाँकेबाट निर्वाचित पदाधिकारी एवम सदस्य, जिल्ला कार्यसमिति तथा केन्द्रिय र प्रदेश पार्षदलाई माला, टीका र खादा लगाई सम्मान गरिएको हो । संघका अध्यक्ष धामी, पूर्व अध्यक्ष कृष्णप्रसाद श्रेष्ठ, नन्दलाल बैश्य लगायतले सम्मान गरेका थिए ।
कार्यक्रममा बोल्ने बक्ताहरुले नेपालगञ्ज उद्योग बाणिज्य संघ र नेपाल पत्रकार महासंघबीच अझ उन्नत र बृहत सहकार्य हुनुपर्नेमा जोड दिएका थिए । पेशागत सवालसंगै दुबै संस्थाले विगतमा आर्थिक, सामाजिक एवम् राजनीतिक आन्दोलनमा महत्वपूर्ण भूमिका निभाएको चर्चा गर्दै बक्ताहरुले भविष्यमा पनि आपसी सहकार्य र समन्वयमा जोड दिए ।
संघका अध्यक्ष धामीले विगतदेखि नै पत्रकार महासंघसंग समन्वय र सहकार्य हुँदै आइरहेको स्मरण गराउँदै अब पनि त्यसरी नै अघि बढ्ने प्रतिबद्धता ब्यक्त गरे । उनले नेपालगञ्जका उद्योगी व्यवसायीले भोगेका समस्याका बारेमा पत्रकारहरुले साथ दिइरहेको चर्चा गर्दै उद्योगी ब्यवसायीका मुद्दामा आगामी दिनमा पनि साथ समर्थनको अपेक्षा गरेको बताए ।
पत्रकार महासंघ लुम्बिनी प्रदेश अध्यक्ष शुक्रऋषि चौलागाई र जिल्ला अध्यक्ष नवीन गिरीले बधाई र सम्मानका लागि संघलाई धन्यवाद ब्यक्त गर्दै एउटै चरित्रका संस्था भएकाले सहकार्य गरेर अघि बढ्ने प्रतिबद्धता ब्यक्त गरेका थिए । महासंघको संस्थागत विकासमा संघको भूमिका रहने उनीहरुको भनाई छ ।
स्थापना दिवसको अवसरमा पूर्व अध्यक्षहरुलाई सम्मान समेत गरिएको थियो । पूर्व अध्यक्षद्वय श्रेष्ठ र बैश्य तथा पूर्व अध्यक्ष स्वर्गीय दामोदर आचार्यकी धर्मपत्नीलाई संघका अध्यक्ष धामीले सम्मान गरेका थिए । कार्यक्रममा बोल्दै श्रेष्ठ र बैश्यले संघको गौरवमय इतिहास रहेको चर्चा गर्दै अग्रजलाई सम्मान गर्ने परिपाटीले संस्थाको सधैं हित हुने बताए । नेपालगञ्ज उद्योग बाणिज्य संघले विगतमा नागरिक अगुवा संगठनका रुपमा काम गरेर स्मरण गराउँदै उनीहरुले पत्रकार महासंघ र संघबीच नंग र मासुको सम्बन्ध रहेको चर्चा गरे । त्यस क्रममा 'केक' समेत काटिएको थियो ।
यसैबीच संघले माघ १० देखि २२ गतेसम्म सञ्चालन गर्न लागेको दोस्रो प्रादेशिक महोत्सवको तयारी तीब्र पारिएको अध्यक्ष धामीले बताए । धामीले महोत्सवलाई भव्य बनाउने गरी लागिपरेको बताए । उनले महोत्सब सफल पार्न मिडियाको अहम् भूमिका हुने बताए। धामीले स्टल निर्माण सुरु गरेको जानकारी दिए । मेला अघि रोजगार मेला समेत सञ्चालन गरिने उनको भनाई छ ।
प्रथम उपाध्यक्ष चिरञ्जीवी वलीले स्वागत मन्तव्य व्यक्त गरेको कार्यक्रमको सञ्चालन महासचिव भीमबहादुर रानाभाटले गरेका थिए ।
