काठमाडौं । ललितपुरस्थित हिमालय कलेजको बीई चौथो सेमेस्टरमा इन्जिनियरिङ संकायतर्फ अध्यनरत विद्यार्थीको हत्या घटनामा पक्राउ परेकामध्ये प्रहरीले एक जनालाई रिहा गरेको छ।

च्यासलस्थित द डाउन हब क्याफेमा विल तिर्ने विषयमा विवाद हुँदा चक्कु प्रहार गरी हत्या गरिएका सुनसरीको इटहरी घर भएर हाल ललितपुरको सातदोबाटो बस्ने २३ वर्षीय नयन गुरुङमाथिको आक्रमणमा संलग्नता नदेखिएपछि पक्राउ परेका दार्चुलाका ४१ वर्षीय पदमलाल भट्टलाई प्रहरीले रिहा गरेको छ।

नयनको हत्या आरोपमा सोमबार राति सवा ९ बजे पदम भट्टसहित डडेलधुराको परशुराम नगरपालिका- ११ घर भई हाल सोही रेस्टुरेन्टमा काम गर्ने २६ वर्षीय हेमराज भट्ट र काभ्रेको मण्डनदेउपुर नगरपालिका-११ घर भइ हाल ललितपुर महानगरपालिका-९ च्यासल बस्ने सोही क्याफेमा कुकको काम गर्ने २२ वर्षीय जनक बहादुर तामाङलाई पक्राउ गरेको थियो।

प्रहरीको प्रारम्भिक अनुसन्धानमा पदम भट्टको संलग्नता नदेखिएपछि रिहा गरिएको ललितपुर प्रहरीले जानकारी दिएको छ। अन्य दुई जनालाई कर्तव्य ज्यान मुद्दामा कारबाही अगाडि बढाइएको ललितपुर प्रहरीले जानकारी दिएको छ।

परीक्षामा पास भएर साथीहरुसँग खुशी मनाउन रेस्टुरेन्ट गएका नयनलाई बिल तिर्ने क्रमश विवाद हुँदा एकाएक  हेमराज भट्टले काउन्टरमा राखिएको चक्कु प्रहार गरेर हत्या गरेको ललितपुर प्रहरी परिसरले जानकारी दिएको छ।

चक्कु प्रहारबाट गम्भीर घाइते भएका नयनको उपचारका क्रममा सोही राति १० बजे मृत्यु भएको थियो। ललितपुर प्रहरीले घटना भएको केहीबेरमै हेमराजसहितलाई पक्राउ गरेको थियो।