एमालेबाट निर्वाचित वडाध्यक्ष श्रीदासको निधन

सोमबार, पुस ८, २०८१

काभ्रे काभ्रेको रोशी गाउँपालिका-१ का वडाध्यक्ष श्रीदास लामाको निधन भएको छ । उनको निधनको शोकमा आज पालिकामा शोक बिदा दिइएको छ ।

रोशी गाउँपालिकाले जारी गरेको विज्ञप्तिमा आज पुस ८ गते पालिकाभर शोक बिदा दिइएको उल्लेख छ । उनको आइतबार उपचारका क्रममा निधन भएको थियो ।

०७९ सालको स्थानीय तह निर्वाचनमा लामा नेकपा एमालेबाट निर्वाचित भएका थिए । उनी एमाले जिल्ला कमिटी सचिवालय सदस्यसमेत हुन् । उनको निधनप्रति एमाले काभ्रेले दुःख व्यक्त गरेको छ ।

एमाले काभ्रे जिल्ला अध्यक्ष राजन भुर्तेलले एक विज्ञप्ति जारी गर्दै लामाप्रति श्रध्दाञ्जली अर्पण गर्दै शोकसन्तप्त परिवारजनमा समवेदना ब्यक्त गरेका छन् । भुर्तेलले जारी गरेको शोक वक्तव्यमा लामा पार्टीको कुशल र जुझारु नेताको साथै जनप्रिय जनप्रतिनिधि रहेको उल्लेख छ ।

प्रकाशित मिति: सोमबार, पुस ८, २०८१  १४:२६
प्रतिक्रिया दिनुहोस्