बाँके  ।  नेपालगञ्जमा सुरक्षित आप्रवासन (सामी) कार्यक्रमले सरोकारवालासंग सचेतनामूलक-अन्तरक्रिया कार्यक्रम गरेको छ ।

अन्तर्राष्ट्रिय आप्रवासी दिवसको अवसरमा सामीले बैदेशिक रोजगारीमा रहेका ब्यक्तिका घरपरिवारका सदस्यहरुसंग सचेतनामूलक-अन्तरक्रिया गरेको सामीका कार्यक्रम संयोजक कमलसिंह नेपालीले जानकारी दिए। बैदेशिक रोजागारीलाई कसरी सुरक्षित, ब्यवस्थित र मर्यादित बनाउन सकिन्छ भन्ने विषयमा बैदेशिक रोजगारीमा रहेका ब्यक्तिका घरपरिवारसंग नगर प्रमुख प्रशान्त बिष्टको अध्यक्षतामा सचेतनामूलक-अन्तरक्रिया गरिएको नेपालीले बताए।

यस्तै दिवसकै अवसरमा बुधबार साँझ वीपी चोकमा बैदेशिक रोजगारीका क्रममा ज्यान गुमाएकाहरुको सम्झनामा दिवंगत आत्माको चीरशान्तिको कामना गर्दै दीप प्रज्वलन गरिएको हो । कार्यक्रममा उपप्रमुख कमरुद्दिन राई, सामाजिक विकास शाखा प्रमुख कृष्णप्रसाद जोशीको पनि उपस्थिति थियो । 

बैदेशिक रोजगारीमा रहेका कामदार र कामदारका परिवारको उचित संरक्षण गर्ने, गन्तब्य मुलुकमा सुरक्षित र सम्मानजनक रुपमा काम गर्न सक्ने गरी कामदारलाई सूचना, सीप, परामर्श लगायतका सहयोग प्रदान गर्ने, बैदेशिक रोजगारीमा सम्बद्ध निकायहरुको क्षमता अभिबृद्धि गरी बैदेशिक रोजगारलाई थप उपलब्धिमूलक बनाउने उद्देश्यका साथ सामी कार्यक्रम सञ्चालित छ ।

सामी कार्यक्रम नेपाल सरकार र स्वीस सरकारको द्विपक्षीय सम्झौता अन्तर्गत सञ्चालनमा छ । यो कार्यक्रम श्रम, रोजगार तथा सामाजिक सुरक्षा मन्त्रालय र स्थानीय सरकारको नेतृत्वमा कार्यान्वयन भइरहेको छ । कार्यक्रमलाई स्वीस सरकार विकास सहयोगको तर्फबाट हेल्भेटास नेपालले प्राविधिक सहयोग उपलब्ध गराइरहेको छ ।