काठमाडौँ । कुनैपनि राजनीतिक दलहरु कहिल्यै पनि स्वतन्त्र हुन नसक्ने नेपाली कांग्रेसका महामन्त्री विश्वप्रकाश शर्माले  बताएका छन् । आज कीर्तिपुरमा आयोजित चुनावी सभालाई सम्बोधन गर्दै राष्ट्रिय स्वतन्त्र पार्टीप्रति लक्षित गर्दै यस्तो बताएका हुन्।

उनले २०७९ को निर्वाचनपछि अहिलेसम्म आइपुग्दा केही मानिसहरुको नारा नै पुरानाको दिन गए भन्ने विषयले आम मानिसहरुमा दलहरुकै दिन गए भन्ने मनोविज्ञान भएको बताए। 

उनले दलको नाम स्वतन्त्र राखेर मानिसहरुको असन्तुष्टिलाई क्याच गरेर ठगी गरेको टिप्पणी गरे। उनले यस्तो भाष्यले दलहरुले वर्षौंदेखि शासन गरे, अब मानिसहरु स्वतन्त्र हुनुपर्छ भन्दै राजनीतिक दलहरुप्रति केही असन्तुष्टि बाहिर आएको बताए । उनले मुलुकमा दलको विकल्प दल नै हुने र लोकतन्त्रको विकल्प फेरि पनि लोकतन्त्र नै भएको बताए । उनले स्वतन्त्र मनोविज्ञानलाई क्याच गर्नको लागि एउटा दलले आफ्नो नाम नै स्वतन्त्र राखेको बताए । 

उनले देशमा हरेक नागरिकलाई स्वतन्त्र नेपाली कांग्रेस पार्टीले बनाएको दाबी गरे । उनले कुनै दललाई नरोज भन्ने अभिव्यक्ति मानिसहरु माथिको हुकुम भएको बताए । उनले पुरानोका दिन गए भनेर दलगत पद्धतीको विरोध गर्ने मनोविज्ञानसँग नेपाली काग्रेस सहमत नभएको बताए । उनले कुनैपनि पार्टी जन्ममितिको आधारमा पुरानो नहुने बताए । उनले राजनीति दर्शन,आर्थिक दर्शन,सामाजिक दृष्टिकोण पुरानै बोक्ने अनि जन्म मिति निर्वाचन आयोगमा दर्ता गरेको कारणले मात्रै नयाँ भन्ने खालको मनोविज्ञान बनाउनु उचित नभएको बताए । 

उनले भने,‘२०७९ को निर्वाचनपछि यहाँसम्म आइपुग्दा केहीको मुद्दा नै पुरानाको दिन गए भन्ने मात्रै छ। पुरानाकै दिन गए भन्दाखेरि अहिले दलहरुकै दिन गए भन्ने मनोविज्ञान पनि छन्। भन्दैगर्दा दलहरुले बर्षौँदेखि शासन गरे, अब मानिसहरु स्वतन्त्र हुनुपर्छ, राजनीतिक दलहरुले काम गर्दैगर्दा केही असन्तुष्टि रहे पनि, दलको विकल्प दल नै बन्छ, लोकतन्त्रको विकल्प फेरि पनि लोकतन्त्र नै बन्छ । स्वतन्त्र मनोविज्ञानलाई क्याच गर्नको लागि एउटा दलले आफ्नो नाम नै स्वतन्त्र राखिदियो । दल कहिले स्वतन्त्र हुँदैन। यो देशमा हरेक नागरिकलाई स्वतन्त्र बनाएको नेपाली कांग्रेस पार्टीले बनाएको हो । आज कुनै दलमा हुन वा नहुनु स्वतन्त्र हुनु होइन । स्वतन्त्र यो देशमा राणाबाट मुक्ति गराएर लेख्न, बोल्न नपाउने बेलामा नेपाली कांग्रेस पार्टीले स्वतन्त्र बनाउने काम गरेको हो । आज बोल्न,लेख्न,दल खोल्न स्वतन्त्रता छ । कुनै दललाई नरोज भन्ने अभिव्यक्ति मानिसहरु माथिको हुकुम हो । कुनै दलमा नलाग भन्ने खालको आदेश नागरिकहरुले भान्नुपर्छ भन्ने छैन । पुरानोका दिन गए भनेर दलहरु पद्धतिको विरोध गर्ने मनोविज्ञानसँग हामी सहमत छैनौं । पुरानाका दिन गए भन्ने साथीहरुले बिसिए यो धर्ती आफैँमा पुराना हो । कुनैपनि पार्टी जन्ममितिको आधारमा पुरानो हुँदैन । नविनतम विचार,प्रवृत्ति र सस्कारमा हुनुपर्छ । पुरानो हुँदैमा खराब र नयाँ भन्दैमा असल भन्ने हुँदैन । राजनीति दर्शन,आर्थिक दर्शन,सामाजिक दृष्टिकोण पुरानै बोक्ने अनि जन्म मिति निर्वाचन आयोगमा दर्ता गरेको कारणले मात्रै नयाँ भन्ने खालको मनोविज्ञान पनि देखिएको छ । अहिले दलहरुसबैतिर नविनता हुँदै छ । दलहरुसबैमा परिवर्तन जरुरी छ ।’

उनले नेपाली कांग्रेस अहिलेको विद्यमान सरकारलाई बलियो बनाउनको लागि पनि उपनिर्वाचनमा मत दिनुपर्ने बताए । उनले उपनिर्वाचनमा कांग्रेसले जित्दैगर्दा नेपाली कांग्रेसका सरकारमा सहभागि मन्त्रीहरुको आत्मबल उच्च हुने बताए । उनले सरकार र सविधान बलियो बनाउन मात्रै नभएर सहकारी ठगी समस्या समाधानका लागि पनि नेपाली कांग्रेसलाई मत आवश्यक परेको बताए । उनले कांग्रेसले संसदमा सहकारी ठगी विषयमा लिएको अडानको कारण सहकारीमा ठगीमा मजदुर,किसानहरुले न्याय पाउने अवस्था बनेको बताए ।