पोखरा । प्रहरी हिरासतमा रहेका पूर्व गृहमन्त्री तथा राष्ट्रिय स्वतन्त्र पार्टीका सभापति रवि लामिछानेलाई थप १५ दिन हिरासतमा राख्न जिल्ला अदालत कास्कीले अनुमति दिएको छ । 

जिल्ला अदालत कास्कीका न्यायाधीश हिमलाल बेल्बासेले जिल्ला प्रहरी कास्कीलाई थप १५ दिन हिरासतमा राखेर अनुसन्धान गर्न अनुमति दिएको हो ।

अदालतले यसअघि पनि लामिछानेलाई गत कार्तिक २५  गते १३ दिन हिरासतमा राख्न प्रहरीलाई अनुमति दिएको थियो । प्रहरीले लामिछानेमाथि पोखराको सुर्यदर्शन सहकारीको रकम गोरखा मिडिया नेटवर्कमा लगेर अपचलन गरेको आरोपमा अनुसन्धान गरिरहेको छ ।

प्रहरी हिरासतमा रहेका लामिछानेसँगै पूर्वडीआईजी छविलाल जोशी र लिला पछाईलाई पनि १५ दिन थुनामा राख्न अदालतले अनुमति दिएको छ ।

लामिछानेविरुद्ध चितवन जिल्ला अदालतले सहरा बचतको रकम अपचलन आरोपमा पक्राउ पुर्जी जारी गरिसकेको छ भने काठमाडौं अदालतले पनि लामिछानेविरुद्ध पक्राउ पुर्जी जारी गरेको छ।