बाँके । बाँकेको नेपालगन्जबाट दुर्लभ पाटे बाघको छालासहित प्रहरीले एक युवकलाई पक्राउ गरेको छ।

विशेष सूचनाका आधारमा जिल्ला प्रहरी बाँकेबाट खटिएको टोलीले नेपालगन्ज-२ पुष्पपाल चोकस्थित महाबुब होटेलको कोठा नम्बर १०१ बाट आज दिउँसो पाटे बाघको छालासहित २८ वर्षीय युवकलाई पक्राउ गरेको  बाँके प्रहरी प्रवक्ता नारायण डाँगी जानकारी दिएका छन् । 

बाँके प्रहरीका अनुसार आज दिउँसो बाघको छालासहित पक्राउ पर्नेमा सुर्खेत बराहाताल गाउँपालिका-२ पाक्माका २८ वर्षीय चन्द्रबहादुर कार्की हुन् । 

बाघको छाला बिक्रि गर्नका लागि कार्की नेपालगन्जको होटेलमा बसेको प्रहरीको प्रारम्भिक अनुसन्धानबाट खुल्न आएको जिल्ला प्रहरी बाँकेले जानकारी दिएको छ। बरामद गरिएको बाघको छालाको लम्बाई ५ फिट ९ ईन्च र चौडाई ३ फिट २ ईन्च रहेको प्रहरीले बताएको छ।

पक्राउ परेका कार्कीसँग थप अनुसन्धान गरिरहेको प्रवक्ता डाँगीले बताए।