लक्ष्मण बस्नेत, तुलसीपुर । राईजिङ स्टार फुटबल क्लब घोराही सर्वाधिक पुरस्कार राशीको तेश्रो हिरा डाँगी स्मृति कप आमन्त्रित फुटबल प्रतियोगिता २०८० फाइनलमा प्रवेश गरेको छ ।

हिरा डाँगी फाउन्डेसन तुलसीपुरको आयोजनामा संचालित प्रतियोगिताको आज सम्पन्न सेमिफाइनल खेलमा एपीएफ लुम्बिनी प्रदेशलाई ४-० गोलले पराजित गर्दै राईजिङ स्टारले फाइनल यात्रा तय गरेको हो । 

उल्लेख्य दर्शकले खचाखच भरिएको अरनिको मैदान तुलसीपुरमा भएको प्रतिस्पर्धात्मक खेलमा राईजिङ स्टारका जर्सी नं. १८ का अरुण चौधरी पहिलो हाफको २७ औ मिनेटमा पहिलो र दोस्रो हाफ्को १६ औं  मिनेटमा दोस्रो गोले गरे । त्यस्तै दोस्रो हाफको थप ३ मिनेटमा जर्सी नं. ११ का जमिर मियाँले थप एक गोल गरे । खेलमा राईजिङ स्टारका खेलाडी अरुण चौधरी म्यान अफ म्याच घोषित भए ।

प्रतियोगिता अन्तर्गत दोस्रो सेमिफाइनलमा टरिगाउँ युवा क्लब तुलसीपुर र साहारा फुटबल क्लब लखनउ भिड्दै छन्  । खेल भोलि आईतवार दिउँसो २ बजेदेखि सुरु हुने फाउन्डेसनका अध्यक्ष पोखर सिंह  डाँगी जानकारी दिए । स्थानीय स्तरमा फुटबल खेलको पहुँच अभिवृद्धि गर्ने र व्यवसायिक फुटबल खेलको विकासमा थप टेवा पु-याउने  उद्देश्यका साथ संचालित प्रतियोगितामा उपाधि जित्ने टिमले नगद २ लाख पुरस्कार पाउने छ। त्यस्तै उपविजेताले नगद एक लाख जित्नेछ। 

त्यस्तै प्रतियोगिता अवधिभर उत्कृष्ट खेल प्रर्दशन गर्ने व्यक्तिगत बिधातर्फ उत्कृष्ट खेलाडी,उत्कृष्ट गोलकिपर र सर्वाधिक गोलकर्ताले जनही ५  हजार रुपैयाँ पाउने छन् । त्यस्तै प्रत्येक म्याचको म्यान अफ द म्याच घोषित हुने खेलाडीलाई नगद एक हजार पाउने छन् ।